Hérna hinum megin við landamæri, s.s. í suðri, er Spánn og hin undurfagra borg San Sebastian, eins gott að vera ekki þmámæltur :)

Við leigðum aftur rútu og tók ekki nema 45 mínútur að aka þangað. Mjög skrýtið að sjá muninn svona alveg um leið og maður ekur yfir landamærin til Spánar - mjög fallegt líka en allt allt öðruvísi einhvern veginn.

Bílstjórinn átti að sækja okkur aftur um 19:00 og markmið okkar var að borða eins mikið Tapas og hægt væri og tókst það vel.

Það var fallegt veður en sólarlaust og fengum við okkur göngutúr um þessa fallegu borg, mynduðum hana og settumst niður hér og þar, já það má með sanni segja að þetta hafi verið rólegheitardagur hjá öllum.

Svo var farið snemma að sofa enda langt flug daginn eftir, lokaspretturinn frá Biarritz til Boston.

Yfirbloggarinn

 

Eins og móttökurnar hérna kvöldinu áður höfðu verið kuldalegar í gráðum mælt, þá svo sannarlega bætti nýr dagur úr því. Annan eins fallegan bæ hef ég aldrei augum litið. Sólin skein, sjórinn var himinnblár og morgunmistrið lyftist af fjöllunum hérna sunnan við flóann eins og sæng að morgni.

Við ætluðum að fara til San Sebastian hérna rétt sunnan við landamærin frá okkur séð en ákváðum að geyma það til föstudagsins, frekar að njóta okkar hérna í þessum yndislega bæ. Hérna búa um 30.000 manns en á sumrin fimmfaldast talan enda er þetta vinsæll ferðamannabær hjá Frökkum, Spánverjum, Þjóðverjum og meira að segja Rússum. Maður skilur það svo sem enda væri varla hægt að skálda fallegri bæ eða bæjarstæði. Hingað ættu allir að koma allavega einu sinni á lífsleiðinni. Allt krökkt í litlum bístróum, kaffihúsum og veitingastöðum auk allra litlu búðanna með allskyns glingri.

Þar sem við erum 10 er það oft erfitt yfirferðar þannig að við skiptum okkur í tvennt, nemendafélagið og foreldrafélagið... ;)

 Það kom öllum vel þar sem fólk gat þá gert það sem það vildi svo var ákveðið að hittast til að borða saman og nú var það sko steik heillin.

Allt í steik...

Fórum á veitingastað sem einhver hafði mælt með og allir fengu sér steik, erum orðin svo samrýmd þessir strumpar ;) Maturinn var góður en félagsskapurinn betri. Eftir matinn fór hluti af okkur upp á hótel en aðrir vildu fara og freista gæfunnar í spilavíti hérna rétt hjá.

Ekki var farið seint að sofa enda var áætluð brottför kl. 08:30 daginn eftir til Bordeux í tveggja stunda akstursfjarlægð til að fara í vínsmökkun.

En nóg í bili mes amis...

A bientot.

 Nú var svo komið að Björg og Kristín Ingva áttu inni smá frí en við hin fórum til Dubai með leigubílstjóra sem leigður var í gegnum hótelið.

Það var tekið skýrt fram að hann væri ekki “gæd” eða leiðsögumaður, hann myndi bara keyra okkur en ekki útskýra neitt. Engin furða, maðurinn kunni ekki stakt orð í ensku og áttum við í mesta basli við að “googla” heimilisföng og annað til að finna staðina sem okkur langaði að skoða. 

Allt þetta hófst á endanum en það sem við gerðum var að gara upp í hæstu byggingu heims, fórum á ströndina að skoða 7 stjörnu “Sex and the city” hótelið að utan, reyndar dýfðum aðeins tánum í sjóinn og tíndum nokkrar skeljar. Fundum meira að segja “Central Perk” kaffihúsið sem er svona “næstum því en ekki alveg” eftirlíking af Central Perk kaffihúsinu í Friends þáttunum. 

Að því loknu var farið í Emirates Mall sem er verslunarkjarni að bandarískum hætti og má með sanni segja að við höfum alveg fundi okkur þar he he. Þar fóru Bjössi, Kristín Helga og Nonni á skíði, já á skíði inni í “mollinu”! 

Svo héldum við heim á leið, eða sko upp á hótel, sæl og rjóð í kinnum, allavega var skíðafólkið rjótt í kinnum.  Farið var snemma í háttinn, enda langur dagur framundan, flug frá Abu Dhabi til Biarritz í suður Frakklandi, Atlantshafsmegin, með millilendingu í Alexandríu á Egyptalandi. 

Bless í bili kroppar!

E.s.

Björg er svo góður prúttari að þegar við vorum að fara heim eftir jeppasafaríið, þá leist henni heldur betur ekki á hraðann og náði hún að prútta hraðann niður í 120 km. á klst! Bara Björg (:

Við lentum á undan áætlun, síðla dags en ekki hvað! Við drifum okkur að undirbúa vélina eins mikið og hægt var fyrir næsta flug til Frakklands með millilendingu í Egyptalandi og það er óhætt að segja að maður hafi svitnað smá í þessum hita.Steinar, Bjössi og Emil héldu áfram með vélina til Al Ain flugvallar sem er í 20 mín. fjarlægð frá Abu Dhabi til þess að geyma hana þar en ekki fékkst heimild til þess að hafa hana í 3 daga á flughlaðinu hér.Við hin fórum rakleiðis af flugvellinum í Abu Dhabi upp á hótel sem lítur út eins og flugstöð, flott hótel og nýtískulegt en okkur leið samt öllum eins og við værum að bíða eftir kalli út í vél þegar við fengum okkur að borða hérna á veitingastaðnum. Höfðum flest okkar, fengið okkur sundsprett hér úti á 5 hæð í hitamistrinu og tunglsljósinu og það var sko notalegt eftir amstur dagsins.Það má með sanni segja að við værum alveg búin á því og allir "skulduðu" svefn og var því farið snemma að sofa.  Daginn eftir ( í dag s.s.) er áætlað að fara í eyðimerkursafarí, BBQ, magadansmær mun dansa og jafnvel verður þarna eitt kameldýr eða svo!

Við kveðjum í bili - endilega að kvitta í Gestabókina okkar,  okkur finnst svo gaman að fá kveðjur.Knúsí knús, við :)

E.s.Vegna lélegrar tengingar hérna hjá okkur er erfitt að setja inn myndir, ætlum að reyna áfram að setja inn en kannksi verður ekkert fyrr en í Frakklandi :) 

Vertu ekki hrædd(ur) við litla mótstöðu. Mundu að "Flugdreki" velgengninnar flýgur hærra á móti vindi erfiðleikanna ekki með honum.